Latest Stories
Sections
Siumjari aku tu – Sapit Menteri Pekara Islam benung ngayanka pementas diri ba mua kamera
Bala orang politik ti tebilang di menua Sarawak udah teleba bendar ngayanka penyiru sida lebuh maya nyuaka pemeri bantu enggau tulung ngagai raban orang ti seranta dalam komuniti sida.
Diatu kitai suah meda suratberita nuliska repot enggau ngayanka gambar pasal orang ti ‘seranta’ nerima pemeri ‘penyiru’ ari sekeda orang politik ti kaya-kaya, ti rindu bendar dipeda orang bukai ngayanka sida nya orang ti siru sereta sinu ke orang bukai.
Ditu, Sarawak Report ngenataika bantah ba pendiau enggau ulah ti baka nya, laban pengawa nya sebaka enggau sebengkah dosa tauka penyalah mandang-mandangka gaya pemerinsa orang ba mua orang mayuh.
Nadai bebasaka orang ti benung ngenatka diri sakit-lengit ketegal deka begambar nyuaka pemeri ti bepelasarka pementas jalai pengarap
Sekeda orang enggau gerempung suah bendar dipeda melakangka rega enggau basa ba orang ti sakit ti benung ngenatka diri ti digambar laban ti deka ngayanka pemerinsa ti ditapi sida baka ti ngayanka raban jelu kurung.
Pengawa nyurungka tulung enggau pemeri nya dikereja ba mua kamera lalu suah bepelasarka ajar jalai pengarap. Tang semua jalai pengarap nagang sebarang orang udu ngemesaika pengawa meri tulung enggau bantu enggau chara ti kelalu lebih sereta enggau enda patut-patut.
Ayanka tuchum ba mua kamera, tauka kita enda diberi tulung tu lagi – chara Daud Abdul Rahman nyuaka tulung enggau bantu ngagai orang ti seranta
Nyuaka tulung enggau bantu ngagai orang ti seranta tauka suntuk nya endang diperansang, tang pengawa nya patut dikereja ba chara ti mit tauka enda bepengerami.
Enti pengawa nyuaka pemeri nya dikereja ngena chara ti besai sereta bepengerami, iya deka ngemaruhka rega diri tauka ngeleseka bala orang ti nerima bantu nya.
Tulung enggau bantu nya datai ari sebarang orang ti udah nelap mansutka belanja, tauka ari tabung perintah empu.
Bala orang politik di menua Sarawak rindu bendar dipeda ngayanka penelap ati sida ba mua mensia mayuh lebuh nyuaka sebarang pemeri tauka bantu. Tang ni maya sida deka nyuaka pemeri ti datai ari kuchik sida empu?
Ke bendar iya, pemeri enggau bantu ti disuaka sida nya datai ari gerempung duit mensia mayuh ti patut diberi ngagai raban orang ti beguna bendar ke bantu, ukai duit datai ari kuchik sida empu.
Engkunduk lalu beri terima kasih ngagai Daud Abdul Rahman – kitai diatu benung digambar
Pemeri nya, sekali ke ari tabung awam, ti dikena orang politik BN ngemanahka diri ba bala pengundi sida, enda salah-salah pemeri nya ari kuchik sida empu, dikena sida meli undi.
Tauka, pemeri nya datai ari tabung pengarap Islam di menua nya empu.
Sapit Menteri Pekara Pengarap Islam Sarawak, Daud Abdul Rahman enggau bos iya, Kepala Menteri Sarawak, Abdul Taib Mahmud, suah bendar diambi gambar nyuaka ‘pementas’ seduai, ngena duit ti digempuruka ari duit mensia mayuh, ke lebih agi ari duit chukai ba orang Islam.
Kenyau ari taun 2001 Taib Mahmud udah ngeluarka sebengkah ordinan undang-undang ti ngasuh perintag ngengkahka semua belanja ti diulih ari chukai ba bala orang Islam dipasukka ngagai tabung Baitulmal, lalu nudukka Daud Abdul Rahman ngemataka tabung duit nya.
Tabung Baitulmal nya nyau chakah agi lebu sida minta pemeri dichabut ari gaji bala menteri Muslim dalam kabinet Taib di Sarawak baka ti udah dipansutka ba pun bulan tu tadi.
Penemuai siku pemesai ari Baitulmal – malik ngagai kamera nyadika tanda terima kasih kita atas pemeri tu
Diatu semakin mayuh bala orang Islam deka dichabut sebagi ari duit gaji sida ngambika dikena ngisi tabung Baitulmal nya.
Kelimpah ari nya Daud mega ditemu regas agi ba raban “orang ti bedosa”, nitihka tanggungpengawa iya ti nyadi Menteri Pekara Pengarap Islam Sarawak.
Perintah Sarawak diatu udah berupai bendar bejalaika atur ngukum raban orang Islam ti ditemu sida enda bepuasa ba bulan Ramadhan (lalu mayuh agi duit ukum nya deka dipasukka ngagai tabung nya).
Tang laban tabung Baitulmal nya mengkang enda ngeluarka repot kira-kira sida, mar bendar kitai deka nemu berapa penyampau ti diberi Daud tauka Kepala Menteri ti nyadi sebagi ari raban orang Islam ti meri ngambika bisi diberika ngagai orang ti seranta.
Tambah mega, Sarawak Report bisi udah nuliska repot pasal kompeni Eastbourne Corporation enggi Daud Abdul Rahman empu ti kala nerima kontrak awam beungkus beribu juta ringgit suba.
Nitihka penerang ti madahka iya nya siku Menteri Pemansang Infrastruktur lalu menua Sarawak endang sebengkah menua ti udu dibalut penyalah makai suap, penerang tu enda ngasuh sapa-sapa tekenyit ati. Tang lebvuh iya nyadi bekuasa ba Opis Pekara Pengarap Islam Sarawak, iya patut ulih ngeluarka belanja 9% ari penguntung kompeni iya empu nya!
Beterima kasih mih ngagai pelajar ba ikas kolej kita – nadai mayuh nembiak Sarawak ulih peluang belajar, taja pan menua Sarawak seruran mujur bulih beribu juta ringgit ari asil kayu batang, minyak enggau sawit
Laman web Baitulmal ti betuaika Taib Mahmud nya penuh enggau gambar bekaul enggau pengawa nyuaka tulung enggau bantu ngagai raban orang ti beguna bendar ke tulung nya. Bantu enggau tulung nya patut disuaka enggau chara ti betul sereta penuh enggau penyiru lalu ukai dikena ngayanka pemesai kuasa enggau penuduk orang politik ti nyuaka.
Berapa rega kerita enggi opis menteri nya enti dibandingka enggau pemeri dalam sampul nya
Ke bendar iya, tu sebengkah publisiti murah ti dikena orang politik ngemanahka diri empu bepelasarka meri tulung ngagai orang ti suntuk tauka seranta.
Repot ti pemadu jai bekaul enggau pengawa ngemaruhka pendiau orang ti seranta udah kala diayanka ba filem Global Witness bekaul enggau pengawa ngerampas tanah orang bansa asal di Sarawak.
Ba filem nya dua iku petunggal Taib Mahmud bisi didinga ngemaruhka penyeranta pendiau orang bansa asal di Sarawak ba pengawa seduai ti deka nyual tanah bansa asal ngagai kompeni menua tasik.
Dalam filem nya seduai bisi didinga ngutuk orang bansa asal ti dirampas sida tanah nya, orang ti penipu. Kenu ku seduai, orang bansa asal ti suntuk nya seruran ngarapka bantu ari bala tuai sida. Lalu seduai mega bisi didinga ngumbai orang bansa asal nya ‘orang kampar’.
Ngulihka peluang ba orang ti seranta – tang pengamu orang politik tu udah ngujungka penyeranta ba orang bansa asal ti kena keruga sida tanah enggau kampung
Anak indu Abdul Rahman Ya’kub dua iku diri menyadi nya udah mujur ngulihka untung ngena tanah orang Dayak, engka seduai iya deka digambar lebuh seduai udah besedia deka nyuaka tulung mi segera ngagai raban orang ti udah dirampas seduai tanah?
Malik ngagai kamera – orang mayuh ti deka meda penyenranta kita lebuh aku nyuaka duit tulung ari Baitulmal tu
Enti pengeraja asal menua Sarawak dipejalaika enggau manah, tentu nadai orang ti kelalu suntuk diau di menua nya.
Laban ketegal ti udah dikeruga orang tanah, nya kebuah penyuntuk datai nuntung orang bansa asal nya. Nya ketegal ari pengawa Taib enggau sida sebilik enggau bala kroni sida.
Ba atas tiap keeping chek ti disuaka Kepala Menteri, Taib udah enda bemunyi ngerumpak bala orang bansa asal ti suntuk ti dikeleseka iya.
Bala orang politik benung bebaris laban deka ninga jaku puji maya nyuaka pemeri asil ari pengawa nerumpak pengeraja asal tanah. Bala menteri baka Awang Tengah suah ngarapka diri menang dipilih baru nyadi pengari ba tiap kali bepilih besai!
Peratika slaid [di baruh gambar] ti ngayanka orang seranta ti diasuh bebaris ba mua tuai-tuai BN ti seruran ngiga peluang dalam laman web sida enggau mega ba surat-suratberita.
Pengawa tu nadai ngayanka basa ba orang ti sakit ngambika dipeda orang mayuh
Menua Sarawak endang enda kurang bala orang ti seranta ngambika bisi diayanka ngagai mensia mayuh. Raban indai tunggal direkod maya sida nerima bantu perintah ngena chek tauka barang pemakai, orang ti sakit lengit di rumah tauka di sepital, orang ti ditinggang penusah angus rumah dipejal tuchum lebuh sida nerima pemeri ari orang politik. Semua ulah nya dikena orang politik ngulihka sukung undi ti datai ari rakyat sida empu, ukai ari kuchik sida empu.
Bala tuai perintah di Sarawak patut badu agi beduan sereta ngemaruhka pendiau enggau pengidup orang ti seranta tu.
Your views are valuable to us, but Sarawak Report kindly requests that comments be deposited in suitable language and do not support racism or violence or we will be forced to withdraw them from the site.